已經安全到港

居然遇上百年一遇既地震, 講真......... 真係好驚

雖然我係東京已經係無咁震, 但係地震既威力真係大, 第一次大震個下我arm arm係上野食完shabu shabu準備行番酒店, 係行過一間拉麪店, 有人大嗌, 跟住成間舖d人走出黎, 我望上天好似有d水跌落黎, 我都唔知係地震, 只係跟其他人行去空曠既地方, 然後就見到好恐怖既野, 就係個地下係咁震, 條橋係咁搖, 維持左一段時間, 肯定超過2分鐘, 真係真係好驚, 好多人走出街上, 隔左一排, d人都開始散, 但係我唔敢行入室內, 一直企係空地

然後想行番酒店, 點知又發生第二次大餘震, 其實呢次我覺得更恐怖, 因為我睇住座大廈係咁搖, 雖然座大廈本身無郁, 但係d百葉簾係咁郁, 條天綫勁搖, 又維持左一分鐘, 我又好驚, 去左一處更空曠既地方, 又企左一個鐘, 跟住番酒店, 但係電梯唔work, 番唔到入房, 跟住又出去行, 見到有d餐廳, 便利店都超開, 仲有好多人玩彈珠機, 仲有心情???

我當時心情仲未平復, 面對不斷的餘震, 我除左驚就mud都做唔到, 又唔敢瞓, 著晒出街衫同鞋預備隨時走, 雖然心裡有一刻諗唔知佢地安唔安全, 但係最後都只係擔心自己有無機番香港, 好彩酒店無停電同上到網

地震第二日都係我原定由成田回港個日, 我一早七點係酒店食早餐, 仲攞多幾個麪包以備不時之需, 仲預備埋個走佬袋, 有水同禦寒衣物, 跟住終於聽到有廣東話, 有香港人呀, 我見佢地拖住喼, 即刻問佢地mud去到機場咩??? 佢地話唔理喇,  坐JR去到東京站再坐narita express.... 當時我仲祝佢地好運..... 咁我點算好呢??? 好唔好去機場呢??? 反正都無野做, 不如又博下啦, 雖然入境處條熱線叫d人唔好去機場, 好彩無聽佢老點

出到去上野JR, 嘩...... 好好好多人呀........ 因為JR剛恢復部份路線, 大排長龍..... 望落地下鐵..... 一樣.... 超多人, 不過好過JR少少, 然後.... 去到京成電鐵..... 好多旅客拖住大喼, 好想去成田空港, 但係去機場都係未開通.... 呢個時候, 我諗起我最愛既都營大江戶線.... 諗起反正香港有入境處既人, 一於去羽田博一博

就係咁, 坐左都營線.....嘩.... 呢d咩線黎嫁.... 居然無mud人, 我仲有位坐, 坐到去大門行去轉Monorail..... 全部都無問題, 正常運作, 又唔係好多人, 超happy, 去到羽田, 即刻搵入境處職員幫忙, 佢問我揸住咩航空公司機票, 我話國泰, 跟住佢話國泰當晚有班機番香港, 不過我心諗.... 都唔論到我上機啦, 跟住問佢知唔知其他airlines d價錢, 佢唔建議我買, 因為ANA班機己起飛, JAL去到$16000, 仲只係standby, 然後佢幫我同國泰d職員講, 去到羽田簡直係天堂, d餐廳同商店全開, 有香港人吹水, 有電視睇

雖然知chance上機未必大, 不過都問地勤我可唔可以confirm第二日既航班, 佢淨係叫我繼續standby, 但係夜晚七點幾, 拒離上機時間3小時, 我再去同地勤八, 佢話我知班機有347個位, 暫時只有141check-in, standby約70人, 好開心呀, 我知應該好大機會上到機, 同我一齊standby既人都好大機會, 然後我將呢個好消息share比入境處既人, 佢都好開心, 佢都好想我地全部上到機

到職員開始call standby d人, 我係第一個被叫出...... 好好好好開心, 但我都好想全部人都上到機, 因為國泰開左架大機黎呀

其實我真係好多野想share, 但係約左屋企人, 佢地唔知我去過日本, 遲d再update