Day 8 池袋、再去台場、返香港 + 部份戰利品

10:00係酒店check out，放低行李就出發。由於老公黎咁多次日本都未去過池袋，所以就坐山手線去，由有樂町去池袋，差唔多係山手線既一半，好彩有位坐，半個鐘好易過。

差唔多十年無黎過池袋，最記得個度有三大百貨公司，東武、西武同Parco，真係好大呀。我淨係響西武都買左４萬幾yen野，買左把ＰＯＬＯ縮骨遮比我老細8400yens，抵啦，後來佢比左$5000利是我 (可惜佢就快離開公司，我被炒指數將大幅上升)。仲有係特賣場買左一條連身裙、一件褸、兩件冷衫同埋d Hello Kitty精品。然後係ANNA SUI買左兩隻介指同手鏈(每件3千幾yen)，三折，好抵，又係Agnes b買左個化妝袋。

我就滿載而歸，我老公一直都唔係幾開心，因為d男裝衫減價唔多，佢買唔到野。其實我地一月尾先到東京d百貨公司已經無晒福袋，但之前一日係台場見到好多舗都仲有福袋賣，Brooks Brothers有個福袋只係20000yens, 裡面有大褸、恤衫、有帽長袖T、樽領衫、背心冷衫、長袖冷衫、頸巾同手巾仔，我記得香港Brooks Brothers d 野都幾貴，所以我地再去台場買個福袋。Brooks Brothers d Sales 真好，開左個福袋比我地任試，我覺得個salesman有d似北村一輝。退埋稅個福袋都係19000yens

然後再係台場間Sanrio買左個福袋，記得杜如風係流行東京都係呢間Sanrio買過福袋，3000yens 全部都係Hello Kitty產品，不過我就無mud興趣，都係送比人做手信je

行下行下差唔多4點，番銀座行多一陳就番酒店執行李。本來諗住坐的士去濱松町轉Monorail，不過見咁多時間剩(執完行李都係6:30pm, 8:45pm機)，咁不如坐JR去濱松町啦，我地之前已經揾左一條路由酒店去車站(全平地)，再係有樂町站搵埋扶手電梯上月台，不過兩個喼都重20kg，仲有一個旅行袋既hand carry，我就行左10分鐘，隻手臂都幾痛呀。好彩就係唔洗托個喼上樓梯，同埋雖然係放工時間，山手線都唔算好多人，由有樂町去濱松町只係兩個站，轉車去Monorail都好方便，全程600yen，架列車有放大型行李位

其中一個喼(左手邊包晒膠紙o個個)手柄一開始已經爛左，我覺得係我由香港飛東京個程機整爛，不過我第二日先發現，ANA梗係唔肯賠啦，淨係肯出封信比我話個喼爛左唔關Airline事。個喼買左6-7年，係我個妹借比我嫁，佢買番黎都係百幾蚊，居然要我賠番$150比佢不過好彩旅遊保險肯賠番$200比我，咁我都賺左$50

右手邊o個個就係Brooks Brothers福袋

好唔捨得但都要番香港，其實兩日係東京係咁行係咁行真係好攰，我覺得玩8日感覺最好，有d依依不捨又未開始悶，玩4、5日對於我黎講又太少，所以我通常去日本都係去8日。

自認唔係咩潮人，去日本買野無mud追求名牌，咩Bathing Ape、undercover、visvim通通都唔啱我，我都係見到咩鍾意就買個隻(最緊要平同最好係日本製)，正如去食野都係去到邊食到邊，不過，我都好想分享下我部份戰利品(唔好意思，都係d cheap野):

呢盒野其實係之前係樂天訂，2000yen 十一件衫福袋加一條990yen裙，買個3000yens野仲要免費送貨

Here we go..... 個11件衫圍起黎百幾yen一件，quality比我想像中好，當然d衫係中國製，但各位有係日本買衫既網友都應該知日本買既衫就算係中國製，品質同cutting都係比較好, 番工攞黎打底都唔錯

呢條裙990yens，我好鍾意嫁，因為著得我唔肥，good

呢d係之前係石之森度買o既

條westwood頸巾好似係3000yens，頂冷帽係仙台買，仙台d款真係好少，不過係東北好凍，無mud選擇之下都買左

富士電視台手信

L'est Rose買，3折左10000yen(日本製)，雖然好多人都話個牌都係釘上去既je，咁都好過買d寫明中國製

都係L'est Rose，3折左10000 yens(日本製)

仲有之前都有介紹過我係樂天訂個d貨

最後個日買個d野無影到，所以睇住咁多先啦。

今次買衫比較多，所以就算個喼好大，都係20kg同21.5kg，無超重