不過對於我地黎講係好事, 因為我地要去JR買Kanto Pass 去熱海, 盛惠8000yen, 雖然架機準時6點到成田空港, 但咁arm有一班澳航客機早我地少少到, 唔知係咪因為復活節假期, 果架機又載滿一機既外籍遊客, 排左十分鐘先過到海關
攞完行李去JR Counter, 已經有d人排隊買飛, 有個鬼婆攪左好耐, 我一早寫好自己要搭既車, 就係第一班7:33NEX去橫濱, 再轉超景踊子號去熱海, 到達時間約十一點, 好彩都順利有位, 攪得黎都7點, 不過都好喇, 之後JR Counter條隊變得超長
我去廁所疏洗, 老公看行李, 我7:20出黎, 然後到老公入去, 唔知係咪佢無留意開車時間, 我頂唔順去男廁門口叫佢出黎, 去到月台超趕呢.... 好彩都趕得切
其實我好少坐NEX, 因為嫌貴, 時間又長, 不過今次買左pass, 咁就坐下啦, 要成兩個鐘先去到橫濱....... 我地梗係大瞓特瞓啦..... 如果無得咁樣瞓一陣, 我一定唔會坐零晨機lor
去到橫濱仲驚蛹子號個月台唔知係邊, 原來只係隔離月台, 好方便
其實之前坐超景蛹子號都好有concern, 因為我由機場直接坐車去熱海.... 咁即係我要帶埋件大行李上火車, 如果係日本坐開火車, 都知日本d火車唔係好多位放行李, 尤其是大喼, 呢方面我好擔心, 但網上又無mud人post相出黎
超景蛹子號徐徐駛進月台, 一切疑團已解開,
除左特大車窗外, 車頂有特大行李格
近門口仲有超大放行李area..... 好開心呀.... 我唔洗擔心個行李....
沿途都係海邊, 好靚啊!! 唔洗一個鐘就到熱海, 第一時間去Nissan Rent-a-car, 租左部March, 我地帶埋AUX線, 可以插iphone, 第一站.... 富士宮.... 如果有睇開我個blog, 都知我去年十月去左一趟河口湖, 但當時只見到一個無雪既富士山, 聽講4月富士山係最多積雪, 今次點都要去一次
不過.... 我十幾年前第一次去富士山個導遊已經話富士山係好難見到.... 咩話?? 我第一次去已經見到啦, 毫無難度.... 但第二次, 第三次去, 發覺原來富士山真係經常有堆積雲, 我朋友教我要早上8點前.... 好有難度wor
講番去富士宮, 由熱海去只係5x公里, 但係行國道都好花時間.... 卒之都要成個半鐘, 終於見到富士山, 但係上面有d堆積雲
我地去左淺間神社, 泊車成300yen.... 無計啦....
4月既日本都仲係好凍呢.... 去完淺間神社就去附近既Aeon Mall醫肚
富士宮炒麵.....
然後向湯河原出發....
沒有留言:
張貼留言