Day 4 (Part 3) 赤阪下午茶, 第一次坐新幹線往名古屋

番酒店取行李前, 係赤阪食個下午茶先, 因為跟住要由赤阪抬行李去東京, 間餐廳好60年代feel

 

cake set 700yen

我最鐘意好多cream既cake

完全在掌握之內, 好快去到東京, 不過新幹線入口都幾遠, 大家最好預番多d時間入閘



被安排係最後個卡

好興奮, 第一次坐咁長程既nozomi

終點站係博多

老公將我地個大行李放左係前一卡最後個行, 我見其他乘客有d放係卡與卡中間

品川, 新橫浜後, 已經係名古屋

其實點解坐5:30pm車呢, 因為想係沿途看看富士山



完全無雲

係BIG CAM幫外甥買左部玩具吸塵機(外甥得歲半但好鍾意吸塵), 一齊坐新幹線去名古屋

唔洗兩個鐘就到名古屋(我好少去名古屋, 印象中少於三次)

 

book左名鐵inn櫻通, 好新啊, 都好近名古屋駅, 附近又好多餐廳

8600yen一晚, 但扣扣埋埋d分, 埋單6000yen

最喜歡新淨既酒店

之前Hot Pepper 成日都送d points比我, 但好快到期, 為左唔浪費, 我又用黎買左餐廳價值3000 yen coupon (我係一個仙都唔洗出), 因為日文係苦手, 原來張coupon係要四個人先可以用, 不過老板都好好人, 話我地當2000yen用都可以, 反正自己都無出過錢買, 咁都ok啦, 仲記得我地冒住風雨去青山一丁目間餐廳唔比我地用d coupon, 今次都預左可能用唔到呢.... 不過預左唔得又用得, 所以好開心

呢間餐廳係名古屋太閣府出口都要行十分鐘(即係我間酒店既相反方向), 有d唔方便, 條路仲要好靜, 係一間bar, 播住d歐洲音樂

餐牌都好特別, 但當然無圖畫啦

所有飲品都係470yen

點左兩款菜, 分別係牛柳

同埋牛舌, 埋單只須比1000yen, 咁即係我只係用1000yen食左呢餐飯

其實自己去旅行一定唔會去呢d bar食野, 但係出奇地煮得好好味, 牛柳入口即融, 但係用左西式煮法, 我懷疑老細係外國學過藝, 佢識講少少英文, 至於牛舌, 食落好似一絲絲, 但又唔un, d汁有d芝士, 所以份量看似好少, 不過都夠飽, 間舖細細地, 氣氛好好, 雖然我地只係坐bar枱, 但感覺好warm

原來lunch都開架

明月下的隱世餐廳



有時我都覺得, 點解去旅行一定要stick to食名物呢??? 呢個世界都有好多小店既出品好有品質, 自己去旅行太著重找名物, 但係唔知幾多次被所謂名店欺騙了, 排一大餐但食物只係好一般

特別係鰻魚飯, 我食過最好味既係鹿兒島天文館商店街, 我唔洗講地址比你知, 你一去到就會聞到, 自然就搵到, 我記得好友移城艾粒都有介紹過, 其實係我n年前跟永安團帶我地去食(估唔到團都有咁既質數), 我5年前再去鹿兒島時去食, 我係老公面前認叻雖然我無上網check定地址, 但一去到已經聞到陣香味, 但係呢間舖又唔算好出名.... 結果味道依然一流